Dekabrın 24-də Bakı Gənclər Mərkəzi və Beynəlxalq Qalereyanın birgə təşkilatçılığı ilə “Uğurlarımızla 2025-ə” Milli Mükafatının təqdimetmə mərasimi və Yeni il bayramına həsr olunmuş sərgi keçirildi. Sərgi-tədbirdə 300 nəfər müxtəlif yaş qrupundan olan rəssam əsərləri ilə iştirak edirdi.

Tədbiri giriş sözü ilə açan Beynəlxalq Qalereyanın direktoru Elnurə İsgəndərova deyib ki, 2024-cü il ölkəmiz üçün də çox uğurlu, məsuliyyətli bir il olub.

“COP29 kimi önəmli bir tədbirə layiqincə ev sahibliyi etdik. Ölkəmizin gündən-günə çiçəklənməsində bir başa əməyi olan cənab prezidentimiz İlham Əliyevi doğum günü münasibətilə təbrik edir, can sağlığı, fəaliyyətində uğurlar arzulayırıq. Sizlər də bu ölkənin mədəniyyət sahəsində aktiv fəaliyyət göstərən vətəndaşlarısız. İl boyu cəmiyyətə verdiyiniz töhfələrə görə təbrik edir uğurlar arzulayıram. “Uğurlarımızla 2025-ə” Milli Mükafatının birgə təşkilinə və ev sahibliyi etdiyinə görə Bakı Gənclər Mərkəzinin direktoru Nərgiz Babayevaya və gözəl kollektivinə təşəkkür edirik”.

Layihə rəhbəri Aygün Əzizova iştirakçıları və fəxri qonaqları salamlayıb çıxışında qeyd edib ki, bu gün il boyu çəkdiyiniz əziyyətin nəticəsi olaraq “Uğurlarımızla 2025-ə” Milli Mükafatı ilə təltif olunacaqsız: “Yeni ildə hər birinizə bol-bol uğurlar və hər zaman vətənimizə layiq vətəndaş olmağı arzulayıram”.

Təbdirdə mükafat alanlar arasında fəxri qonaq olaraq Azərbaycan Respublikasının Əməkdar artisti, sevilən sənətkarı Səlim Abbasov, Azərbaycan Respublikasının əməkdar artisti Misirdə keçirilən “Kainatın gözəllik kraliçası” beynəlxalq gözəllik müsabiqəsində ölkəmizə birinciliyi qazandıran Naina İbrahimova, istedadlı modalyer Leyla Əhmədova, Qol Güləşi Federasiyasının vitse-prezidenti dəfələrlə Avropa və Dünya Çempionu adını qazanmış Azər Məhərrəmov, yazıçı Sevinc Rza da iştirak edirdi. Mərasimdə il ərzində aktiv fəaliyyət göstərən incəsənət və media nümayəndələri mükafatlandırıldı. Xarıbülbül rəqs qrupunun bədii rəhbəri Amil Əhmədovun tələbələri, Xarıbülbül rəqs qrupunun üzvü Bakı-İstanbul liseyin şagirdi Zəhra Dadaşzadə, istedadlı rəqqasə Firəngiz Balışova, gənc rəqqasə Fatimə Rüstəmova gözəl rəqsləri ilə iştirakçıları heyran ediblər. Əməkdar artist Səlim Abbasov çıxışı ilə tamaşaçıları coşdurub.

Tədbirdə eyni zamanda yazıçı Sevinc Rzanın “Qubadlıda susan ürək” adlı kitabının təqdimatı da keçirildi. Kitab Azərbaycan Respublikası Silahlı Qüvvələrinin Sülhməramlı taborunun komandiri, şəhid mayor Rəhim Hüseynovun əziz xatirəsinə həsr olunub.

Aygün Oqtay
Fotolar Mahir Əhmədovundur
Operator: Xatirə Məmmədova