Fond universal şəxsiyyətin formalaşması üçün “Uğur düsturları kursu” təşkil edir

“ULUS” Fondu Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə yardımı ilə Universal şəxsiyyətin formalaşması üçün “Uğur düsturları kursu”-nun açıldığını bəyan edir. Bu barədə İlkxeber.org-a layihənin rəhbəri Əlisafa Mehdi məlumat verib. Məlumatı olduğu kimi dərc edirik:

Ölkə vətəndaşları xüsusi təyinatlı, dövlət və özəl olmaqla 61 ali məktəbdə 148 ixtisas üzrə təhsil alırlar. İxtisaslar ciddi dəqiqliklə sahələşdirildiyindən tələbələr universal biliklərin öyrənilməsinin üsul və modelinin formalaşmasına ehtiyac duyurlar. Bu gərəkliliyi önə çəkərək təklif etdiyimiz bu təlimlər:

1. dövlət, dövlətin xarici və daxili siyasəti;
2. xalq, millət və ümumbəşəri maddi-mənəvi dəyərlər;
3. milli ideologiyanın formalaşmasında şəhid-qazi anlayışının əhəmiyyətli rolu və milli dəyəryaratma hadisəsi olduğu;
4. qlobal texnologiyanın gətirəcəyi yeniliklərə hazırlıq;
5. sosial davranış texnologiyası;
6. konfliktlərdə davranma;
7. karyera uğurları, liderlik keyfiyyətləri və s. bilikləri öyrətməklə tələbə-gənclərin layiq vətəndaş keyfiyyətində sosiallaşa bilməsinə, şəxsiyyətin özünü intellektual səviyyədə ifadə etməsinə yardım olacaq, bu üsulla universal bilgili vətəndaş yetişdirməyin modeli qurulacaq.

Universal bilgiləri və idarəçilik bacarıqları olan intellektual gənclərin perspektivlərini müəyyən etmək üçün 26 iyul 2019-cu ildə Prezidentin Sərəncamı ilə yaradılmış "Yüksəliş" müsabiqəsinə qoşulmaq üçün bu təlimlər təməl hazırlıqdır.

Layıhə çərçivəsində 20 əsas ixtisas üzrə 20 magistr tələbə seçiləcək. Onlar uğur düsturlarının tam kursunu öyrənəcəklər. O cümlədən, təlimalanların hər biri öz ixtisasları üzrə təlim verəcəklər.

Bu pilot layihədir. Təlim gedişində “Uğur düsturları kursu”-nun bitkin təlim bazası formalaşacaq.

Bununla da:

1. Gənclərimizin dünyanın vahid mənzərəsini anlamaqda, cəmiyyətdə öz yerini tapmaqda, uğurlu karyera qurmaqda, sosiallaşmaqda savadlı və səriştəli davranmağın;
2. Beynəlхalq sistemə peşəkarlıqla inteqrasiya olunma, yetkin təcrübələri mənimsəməyin;
3. Regional, lokal böhran və münaqişələrin prоfеssiоnal araşdırılması ilə infоrmasiyalı cəmiyyətin formalaşmasına xidmət etməyin;
4. ölkələrin qarşılıqlı iqtisadi, siyasi, informasiya və mədəni proseslər zəminində informasiyalaşdırmanın snergetik mahiyyətini qavramağın;
5. bütün bu bilgilərlə həm də Media aləminin ekspert bazasını təmin etməyin;
6. dünyada baş verən ciddi dəyişilmələri, konflikt situasiyaların proqnozlarını operativ olaraq cəmiyyətə çatdırmağın ənənəsini yaratmış olacağıq.

Düşünürük ki, bu layihə ölkənin 198 minlik tələbə kontingentinin, ümumilikdə gənclərin hərtərəfli inkişafına dəstək üçün qeyri-formal məktəb – təlim bazası kimi formalaşa biləcək.

Ölkənin bütün magistr tələbələrini təlimlərə dəvət edirik.

Təlimlər Bakı şəhərində, 1 ay müddətində, 10 təlim olmaqla 1, 3, 5-ci günlər, saat 2-dən 6-ya qədər veriləcək.